Emosyonal nga mitubag si Sta. Cruz Mayor Jose Nelson “Tata” Sala sa nagkadaghang kritisismo batok kaniya sa social media, ug klaro nga iyang gihangyo ang mga bashers nga undangon na ang pag-apil sa iyang asawa ug anak sa mga personal nga pagpangdaot.
Sa usa ka video nga iyang gipatik sa social media, giatubang sa alkalde ang mga pasangil ug komentaryo batok kaniya, lakip na kuno ang usa ka media personality sa dakbayan sa Davao nga pirmi motira og mga komentong maka-ugat sa online.
Matud pa ni Mayor Sala, dawaton niya ang tanang pana ug batikos kay kabahin kini sa serbisyo publiko apan lahi na kuno kung ang pamilya na ang hilabtan.
Gipasabot usab niya nga ang iyang miaging pahayag kabahin sa “paabuton” nga impormasyon sa kaso sa pagpatay ni Tres de Mayo Barangay Captain Oscar “Dodong” Bucol Jr. gikonekta lamang sa negosyo sa iyang pamilya, kay trabahante kuno nila ang usa sa nalambigit sa kaso.
Gipunting niya nga wala siya’y rason, interes, o katakos nga mopatay og tawo.
Padayon nga nagdilaab ang diskusyon online tungod sa kaso ni Bucol nga nakadani og dakong interes sa publiko.
Giklaro sa kampo sa Mayor nga ang iyang reaction video gituyo aron mapahunong ang personal nga atake ug masentro ang istorya sa legal nga proseso ug tinuod nga imbestigasyon.
Samtang nagpadayon ang imbestigasyon sa SITG Bucol ug PNP, nanawagan usab si Mayor Sala sa katawhan nga dili magpadala sa tsismis ug mga suspetsa ug mas musalig sa pormal nga resulta nga imbistigasyon sa otoridad.
