DAVAO CITY – Nagpadayag sa iyang pagpasalamat si Davao City Mayor Inday Sara Duterte-Carpio sa mga dabawenyo gumikan sa pagpili kaniya ug sa mga nakab-ot sa dakbayan sa kasamtangan ug daku ang iyang pagtoo nga magpabilin nga lig-on ang siyudad bisan nga matapos na ang iyang termino sa Hunyo 2022.
Tipik lamang ang pahayag sa Mayor human ang iyang Valedictory ug State of the City Address (SOCA) kagahapong adlawa.
Sumala sa Mayor nga tungod sa mga pagpaningkamut nga gihimo sa siyudad ug sa dabawenyos, naangkon sa dakbayan ang mga awards, citations, ug recognitions.
Kahinumduman nga nakaangkon ang dakbayan ug kinatibuk-ang 118 awards ug recognitions gikan sa gobyerno ug non-government organizations sukad September 2016 hangtud Pebrero 2022 kalakip na ang 20 ka mga award sa governance ug overall competitiveness; 20 sa health ug social services; 15 sa fiscal performance and management; 12 sa agriculture ug environment; siyam sa peace and order and security; siyam sa economic and business achievements and policies; walo sa disaster ug emergency efforts; pito sa literacy, arts, ug information dissemination; unom sa infrastructure; unom sa employment; ug unom sa tourism.
Una niini, nanamilit na sab ang Mayor sa mga Dabawenyos human nga nagpapili na siya sa mas taas nga posisyon.
Nagpasalamat sab kini isa mga opisyal ug empleyado sa City Government of Davao, sa iyang mga naka-trabaho ug tanan nga mga volunteers nga mitabang kaniya arun nga maangkon sa siyudad ang paglaum ug pangandoy.
Nakatampo sab sumala pa ug daku sa kalambuan sa dakbayan ang mga private sector, national government agencies ug offices, sectoral groups, diplomatic community, AFP, PNP ug daghanan pa.
