DAVAO CITY – Nagpasidaan karon si Davao City Mayor Inday Sara Duterte-Carpio ngadto sa mga empleyado sa lokal nga panggamhanan nga kung dili pa sila fully-vaccinated ayha mahuman ang kasamtangang tuig, dili na ipang-renew ang ilang kontrata.
Sakop sa maong abiso ang tanang empleyado sa City Government, apil na ang mga job order ug mga naka-contract of service.
Aduna usab ipagula nga executive order kalabot niini, diin malakip ang dugang detalye alang sa pagpatuman sa bag-ong polisiya.
Lauman nga mapagula kini sa mga muabutay nga adlaw.
Daan nang nagpahibalo ang Department of Labor and Employment kon DOLE pinaagi sa Labor Advisory Number 3. nga gipirmahan ni Secretary Silvester Bello III, nga dili tugutan ang pagpatuman sa “No vaccine, no work” policy.
Ang pagpatuman usab sa polisiya, matud sa DOLE, usa ka pamaagi sa diskriminasyon sa mga trabahante nga wala pa o dili gusto magpabakuna batok COVID-19.
