DAVAO CITY – Nakakuha na sab karon ug pagtagad kang Davao City Mayor Inday Sara Duterte-Carpio ang nagkataas nga ihap sa mga bata nga natakdan ug covid-19 dinhi sa dakbayan sa Davao.
Sumala sa opisyal nga nahisgutan na sab ang maong kabalaka sa anti-Covid 19 response cluster.
Andam sumala pa ang Mayor nga ipatuman sa hinanaling panahon sa higayon nga magpagula ang Department of Health (DOH) ug guideline nga ilakip ang mga bata nga adunay comorbidities sa mga anaa sa A3 priority group.
Nagtoo ang opisyal nga ang nagtakaas nga kaso sa mga bata ug batan-on ang hatud sa mas makatakod nga variant sa covid-19.
Una ng gibutyag sa Mayor nga adunay gi-alokar ang siyudad nga pediatric isolation facilities ug ablihan kini aron nga i-convert sa adult isolation facilities sa higayon nga adunay dako nga pagsaka sa kaso sa mga bata nga matakdan ug COVID-19.
Doble paningkamut sab karon ang lokal nga kagamhanan aron lamang mapugngan ang padayon nga pagsaka sa mga natakdan sa virus.
