Wala’y plano si Baguio City Mayor Benjamin Magalong nga mangayo og dispensa sa mga kongresista kalabot sa iyang gipahayag nga anomalya sa mga flood control projects sa Department of Public Works and Highways (DPWH).
Gisugyot ni Manila 6th District Rep. Benny Abante nga dapat mangayo og pasaylo si Magalong sa Kongreso tungod sa iyang mga akusasyon.
Apan giklaro sa alkalde nga dili siya mobuhat niini kay matod niya, klaro nga kabalo ang mga kongresista mismo kung kinsa ang nalambigit sa maanomalyang proyekto.
Dugang pa niya, dugay na kini nga isyu nga gihisgutan sa sulod sa han-ay sa Kongreso ug kinahanglan lang gyud nga ipadayag aron mahatagan og hustisya ang katawhan.
Gipadayag usab ni Magalong nga ang iyang pahayag usa ka panawagan alang sa transparency ug accountability sa paggamit sa pondo sa gobyerno.
Matod pa sa alkalde, nga dili dapat mahimong tabon-tabon ang anomalya sa flood control projects tungod kay kini direktang nakaapekto sa kaluwasan ug kinabuhi sa mga Pilipino nga pirming apektado sa pagbaha.
