DAVAO CITY – Giduaw ni Davao City Mayor Sara Duterte-Carpio ang mga overseas Filipino workers sa Macau aron nga pangumustahon ang ilang kahimtang didto.
Kini taliwala sa isyung naglimin sa kahimtang sa mga OFWs sa uban nga nasod human sa ngilngig nga pagpatay sa OFW nga si Joanna Demafelis.
Sa iyang pakigpulong atubangan sa mga Pinoy workers nga mitambong sa Tapang at Malasakit Macau Alliance Convention sa Chan Meng Kam Theatre sa Macau, gipahayag sa alkalde nga daku ang iyang respeto sa mga OFWs gumikan sa pagsakripisyo sa mga nahisgutan human mahilayo sa pamilya.
Gipasalamatan sab sa Mayor ang mga mamumuong Pinoy nga nahimong dakung bahin sa pagkadaug sa iyang amahan niadtong 2016 nga presidential elections.
Gipasalig sa alkalde sa mga OFWs nga tumanon ni Pangulong Rodrigo Duterte ang saad niini alang sa komportable nga kinabuhi alang sa mga Pilipino.
Mahinumduman nga nakigkita ang Davao City Mayor sa mga Pinoy workers sa Macau usa ka adlaw human nga opisyal nga gilunsad sa dakbayan sa Davao ang Hugpong ng Pagbabago (HNP), usa ka regional party.
