DAVAO CITY – Hugtanong gipamahayag ni Davao City Mayor Sara Duterte-Carpio nga magpabilin ang mga polisiya sama sa 24-hour liquor ban, curfew, food and medicine (FM) pass, ug district clustering system bisan pa man nga mopailalom na ang siyudad sa general community quarantine (GCQ) sugod sa Mayo 16.
Gihimong basehan sa Mayor ang nakalatid sa Inter-Agency Task Force on Emerging Infectious Diseases (IATF-EID) omnibus guidelines sa pagpatuman sa community quarantine sa nasod.
Kahinumduman nga gi-rekomenda sa IATF-EID nga ipailalom ang tibuok Davao region sa general community quarantine (GCQ) sugod sa Mayo 16.
Apan ang dakbayan sa Davao ug Davao de Oro ang ipailalom pa sa verification ug masayran karong adlawa kung tugtan na kini nga magpatuman ug GCQ.
Apan gikanayon ni Mayor Inday nga pipila sa mga polisiya nga gipatuman ilalom sa Executive Order 23-A o enhanced community quarantine (ECQ) ang pabilin nga ipatuman.
Gikanayon sa Mayor nga kinahanglan bag-ohon ang gipatuman nga curfew hours sanglit aduna nay tugtan nga makabalik sa ilang trabaho ilalom sa GCQ ug posibleng dili makauli sa ilang panimalay ang mga trabahante ilabi na kung magpabilin ang alas sais sa gabiie hangtud alas sa buntag nga curfew.
Magpabilin sab sumala pa ang libre nga bus rides alang sa mga essential workers.
