DAVAO CITY – Gi-rekomenda sumala ni Davao City Mayor Inday Sara Duterte-Carpio ngadto sa Department of Education ug Local Government Unit (LGU) sa Mati ang pagpa-imbestiga sa mga magtutudlo ug ang mga tawo nga in-charge sa grupo sa mga atleta gikan sa Mati City nga nabiktima sa food poisoning.
Kini human masuta sa mga pasi-una nga imbestigasyon sa City Health Office nga ang mga bahaw nga mga pagka-on nga gi-init-init lamang ang nahimong hinongdan sa pagkalanag sa mga biktima.
Kini nga reckless action mi-resulta ngadto sa pagka-angol sa 38 ka mga tawo, diin kadaghanan kanila mga bata nga gisalig sa mga ginikanan ngadto sa mga tawo nga mao ang mi-angol kanila.
Gituohan nga ang sobra nga pagdaginot sa mga gitahasan sa paghikay sa pagka-on sa mga nabiktimang mga atleta ang nag-unang hinongdan nga nabutang sa katalagman ang kinabuhi sa mga kabatan-onan.
Ang limitado nga resources dili sumala pa angayan nga mamahimong rason nga mabutang sa pelegro ang mga kabataan nga gisalig sa mga ginikanan.
Sumala pa kang Mayor Inday Duterte-Carpio nga ang kagamhanang local isip host sa DAVRAA andam nga motabang basta ba lamang nga ipahibalo sa mga natungdan ang ilang panginahanglanon aron nga mamahimo nga komportable ang ilang pagpabilin sa dakbayan.
Nasuta karon sa pasiuna nga report sa City Health Office nga ang mga tawo nga gisaligan sa contingent sa mga atleta gikan sa Mati City mi-serve sa mga bahaw nga pagka-on sa mi-agi pang gabii alang sa pamahaw sa mga atleta.
Ang mga leftovers gi-serve alang sa pamahaw ug pani-udto , bisan pa sa panihapon.
Gikataho sab nga gitugtan nila ang mga atleta sa pag-inum gikan sa tubig gikan sa lain nga tinubdan nga wala seguro kung haum ba kini sa human consumption.
Kahinumduman nga mi-responde ang Davao City Government ngadto sa emerhensya, human nga 38 ka mga membro sa Mati City contingent sa DAVRAA 2018 ug gi-admit ngadto sa Southern Philippines Medical Center (SPMC) gumikan sa pagsuol sa ilang mga tiyan ug paghibulos o loose bowel movement (LBM).
