DAVAO CITY- Daw napuno na si Davao City Mayor Sara Duterte Carpio sa kanunay niini nga pahimangno nga magpabilin lamang sa mga panimalay ug likayan ang paggawas ilabi na kung dili kini mahinungdanon.
Sumala sa Mayor nga dungan sa pagpatuman sa color coding sa Food and Medicine (FM) pass, kinahanglan nga tumanon kini sa katawhan ug dili magmagahi.
Laraw niini nga dyutay na lamang ang mogawas aron nga malikayan sab ang pagtako-takod sa sakit ug mapugngan ang pagsaka sa virus sa Davao region ug dinhi sa dakbayan.
Wala na sab sumala pay rason nga mogawas ug adlaw nga domingo sanglit igo na ang tulo ka adlaw nga gitagana sa FM aron nga mopalit ug pagkaon ug medisina.
Kahinumduman nga mihimo na karon ug lakang ang kapulisan ug lokal nga panggamhanan aron nga mapahugtan pa ang mga sumbanan ilabi na karon nga gilugwayan pa ang pagpatuman sa Enhanced community quarantine gumikan kay padayon nga nakatala ug kaso sa Covid-19 ang Davao region.
