DAVAO CITY – Nagpahigayon og inspeksyon si Davao City Mayor Inday Sara Duterte-Carpio sa nagapadayong Bakuna by the Sea sa Waterfront Insular Hotel ning Dakbayan kagahapon sa buntag.
Kauban usab niya si Senador Win Gatchalian, nga usa sa mga gibutyag kaniadto sa Mayor nga nagaduol sa iyaha aron maka-tandem sa piniliay sunod tuig.
Ang pagbisita sa vaccination site alang sa tourism ug allied services employees, usa sa mga pamaagi sa pagpakusog sa vaccination rollout sa Dakbayan, aron na usab makab-ot ang herd immunity kon 1.2 million vaccinated individuals karong tuiga.
Tumong usab sa pagpakusog sa pagpamakuna ang hinanaling pagbalik sa pre-COVID level sa ekonomiya sa Dakbayan.
Sa Bakuna by the Sea, gikan sa unang 14,000 ka tourism ug allied services workers, dugang 11 hangtod 25 thousand pa ka economic frontliners ang laraw mabakunahan sa ikaduhang hugna sa maong sectoral vaccination program.
Gipangutana usab ang Mayor kabahin sa pagbag-o sa hunahuna niini nga inay mudagan alang sa iyang ikatulong termino isip Alkalde sa Dakbayan, mudagan kini isip Presidente sunod tuig.
Apan, walay komento labot niini si Duterte-Carpio ug igo na lang nga nikatawa.
Kahinumduman nga gikumpirma sa iyang tigpamaba nga si Liloan Mayor Christina Garcia-Frasco nga mupapili kini isip Mayor sunod tuig, kauban usab ang iyang igsuon nga si Vice Mayor Sebastian Duterte nga magpa-reelect isip Bise Alkalde ning Dakbayan.
