DAVAO CITY – Gipanghimakak ni Davao City Mayor Inday Sara Duterte Carpio ang migula nga report nga gidiktahan niya ang uban nga Local Government Units (LGUs) kalabot sa pagsulod o paggawas niini sa ilang areas.
Sumala sa Mayor nga mihangyo lamang sila sa mga nahisgutan nga undagon ang pagpangayo ug daghanang dokumento gikan sa mga tawo nga mibiyahe sa ilang areas gumikan kay dili sumala pa kini mahinungdanon.
Gipasabot sa Mayor nga ilalom sa Inter-Agency Task Force Omnibus Guidelines, ang interzonal movement sa mga tawo tali sa uban nga dapit nga gipailalom sab sa GCQ gawas lamang sa leisure ang mamahimo nga tugtan.
Dugang sa opisyal nga kung dili sumala pa tugtan sa uban nga LGU nga pasudlon ang mga tawo sa ilang areas ilabi na kadtong gikan sa Davao, mas maayo sumala pa nga magpatuman sila ug Enhanced Community Quarantine (ECQ).
Gitino sab ni Mayor Inyda nga ang pagdili sa pagpasulod ug mga tawo pinaagi sa lockdown ang dili garantiya nga maprotektahan sila sa coronavirus.
Gani mas maayo sumala pa nga mangandam ang mga LGUs sa posibleng pagsaka sa Covid-19 patients.
Kahinumduman nga daghanang mga LGUs sa Davao region ang wala nagapasulod ang mga tawo nga gikan sa dakbayan sa Davao kini tungod sumala pa sa taas nga kaso sa covid-19 sa dakbayan.
