DAVAO CITY – Gipahugtan pa karon sa otoridad ang ilang operasyon batok sa mga indibidwal nga nagapamaligya ug ilimnong makahubog sa ilang komunidad sa taas nga presyo.
Tipik lamang kini human nga gibutyag ni Mayor Inday Sara Duterte-Carpio nga nakadawat pa gihapon kini ug report nga adunay pa gihapoy nagapamaligya ug ilimnong makahubog nga patago bisan nga hugtanon pa gihapon nga gipatuman karon ang liquor ban.
Gikanayon sab ni Mayor Inday nga wala pa nahisgutan karon ang pagtapos sa liqur ban bisan nga gipailalom na karon ang siyudad modified enhanced community quarantine (MECQ) gikan sa general community quarantine (GCQ) with heightened restrictions kaniadtong Hulyo 16.
Gibarugan sa Mayor nga sagad panahon sa inom mahitabo ang transmission sa kagaw sanglit makalimtan na ang physical distancing ug uban pang health protocols.
Gipabantayan na sab karon sa Mayor ang utlanan sa dakbayan paingon sa Davao del Sur human ang nadawat nga impormasyon nga adunay motabok sa maong lalawigan aron nga didto mag-inom ug magtapok-tapok sanglit walay gipatuman nga liquor ban sa lugar.
Gipatuman na karon sa kapulisan ang ilang “drunk driving operation” ngadto sa mga motorista nga mosulod sa Binugao checkpoint.
