Mayor Inday, gikondena ang pagpanunog sa 10 heavy equipment sa Davao
DAVAO CTIY – Hugot nga gikondena sa lokal nga kagamhanan sa dakbayan sa Davao ang gihimo sa NPA nga pagpangsunog sa napulo ka mga heavy equipment sa tulo ka mga barangay dinhi sa syudad niadtong Sabado.
Sa gipagawas nga statement ni Davao City Mayor Sara Duterte Carpio, gikanayon niini nga nagpakita lamang kini sa pagkatalawan sa NPA ug gipamatud-an lamang ang nahimong deklarasyon ni Pangulong Rodrigo Duterte nga ang NPA usa ka grupo sa mga terrorista nga angayan lamang nga kondinahon.
Tungod sa maong panghitabo, temporaryo una nga gihunong ang konstraksyon sa mga dalan sa Barangay Callawa sa Buhangin District, Barangay Fatima sa Paquibato, ug Barangay Dalagdag sa Calinan.
Ang nahisgutan nga road projects ang gipangunahan sa kagamhanang local sa Davao ug sa administration ni Pangulong Rodrigo Duterte aron nga muhatod ug kabag-uhan sa kinabuhi sa katawhan sa nahisgutan nga dapit hilabi na sa paghatod sa mga nag-unang panginahanglon sa maong dapit sama na lamang sa edukasyon, panlawas ug uban pa.
Sa karon, gimanduan na ang kapulisan ug kasundaluhan nga muhimo ug lakang batok niini, Samtang nanawagan sab si Mayor Inday sa mga Dabawenyo nga suportahan ang kagamhanan ug kondinahon ang mga NPA nga giilang terroristang grupo.
