DAVAO CITY – Gipasalig ni Davao City Mayor Sebastian ‘Baste’ Duterte ngadto sa katawhang dabawenyo nga hingpit nga ipatuman ang balaud alang sa tanan ug labaw sa tanan iyang panalipdan ug ipromotar ang kaayuhan alang sa tanan.
Kini ang giluwatan nga pamahayag ni Mayor Baste Duterte atol sa iyang inaugural speech sa city hall grounds kagahapong adlawa human sa iyang pagpanumpa atubangan ni Judge Loida Posadas-Kahulugan sa Court of Appeals session hall sa Sangguniang Panglungsod building alas 2:55 kagahapon sa hapon.
Sumala ni Mayor Baste nga atol sa iyang termino isip mayor sa Davao City, hatagan niya ug nag-una nga pagtagad ang food security ug ang paghatud sa nag-una nga mga panginahanglanon sa katawhan.
Mitambong sa oath-taking ceremony ni Mayor Baste ang iyang mga ginikanan nga sila Elizabeth Zimmerman ug Outgoing President Rodrigo Duterte ug ang iyang igsoon nga iyang gipulihan sa pwesto nga si kanhi Davao City Mayor ug karon Vice President Sara Duterte.
Gikanayon usab ni VP Inday Sara nga dako ang iyang pasalamat sa katawhang Dabawenyo gumikan sa padayong pagsalig ngadto sa ilang pamilya.
Alang kang VP Inday Sara nga atol sa paglingkod ni Baste kaniadto isip besi mayor sa syudad, iyang nakita ang maayong tumong niini alang sa syudad ug sa tibuok katawhan alang sa kalinaw, kalambuan ug seguridad sa syudad.
Samtang, dungan usab nga nanumpa sa ilang katungdanan kagahapong adlawa ang mga nakadaug nga konsehal ug mga representante sa kongreso gikan sa tulo ka distrito sa dakbayan sa Dabaw.
Via || Angie Chagas
