DAVAO CITY – Nangayo og pagpasabot Davao City Mayor Sebastian Duterte ngadto sa Department of the Interior and Local Government kon DILG mahitungod sa nahitabong administrative relieve sa 35 ka mga personahe sa Davao City Police Office.
Sumala sa mayor, “extraordinary move” matud pa ang gihimong temporaryong pagpahawa sa mga pulis ug gituohang “politically motivated” sa kasamtangang administrasyon batok sa mga Duterte. Gikanayon sa mayor nga nahimong maayo ang pagdala sa mga nahisgutang pulis ug maayo sab ang track record nila nga nagsilbi sa katawhan sa dakbayan.
Dugang pa sa mayor, dili matud pa krimen ang gipakanaog nga kamanduan nga magdeklara og war on drugs kon buot kini itandi sa mga kurap ug mga nagapangtamay ug nangapangabuso nga pulis alang sa ilahang kaugalingong kaayohan.
Buot madunggan sa mayor ang habig nila DILG Secretary Benhur Abalos o ang panig ni PBBM kalabot sa maong lakang.
Una nang nagpadayag og pagkadismaya si Mayor Baste atol sa nahitabong presscon sa wa nadayon nga Hakbang ng Maisug Rally sa Tacloban City diin gikwestyon niini ang pagkwestyon sa gobyerno sa gipanukad nga war on drugs campaign nga unang gisugdan ni kanhi Davao City Mayor ug Pangulong Rodrigo Duterte.
Gikanayon pa niini nga mahimong mag-imbestigar ang nasudnong gobyerno sa sitwasyon sa droga sa nasud, apan midugang nga dili niya masabtan ang paggahin og oras sa kasamtangan nga administrasyon nga mag-imbestiga sa pagdeklarar sa nahimong kamanduan sa usa ka public official, nga kahinumdumang nakapahipos og 7 ka mga gituohang durugista human sa sunod sunod nga anti drug operations niadtong Marso.
via || Bombo LJF
