DAVAO CITY – Gisaway karon ni Davao City Mayor Sebastian “Baste” Duterte ang pagkonsidera ni PBGen. Nicholas Torre III sa iyang kaugalingon nga propesyonal rason nga dili na kini angay pang-motubag sa mga giluwatang pamahayag sa mayor kalakip na ang laraw nga pagsagpa kaniya.
Sumala pa ni Mayor Baste nga kung tinood gayud kining propesyunal, wala na lamang kini mitingog pa inay nga pagpaka-aron ingnon.
Subli sab niining gihagit ang opisyal sa pagpaguwa sa theoretical framework nga gigamit niini tungod na usab sa pagmugna og conclusion sa kasamtangang kahimtang sa dakbayan.
Gipangita sab sa mayor ang comparative analysis sa opisyal aron matud pa masuta kung gitun-an ba gayud niini ang tanang angay tun-an ayha nga moluwat na lamang og bisan unsang pamahayag.
Sa kinaulahian, gihagit ni Mayor Baste si PBGen. Torre nga tubagon ang tanan niyang pangutana ug kung wala man lang kini ipakita, mas maayong mohilom na lamang.
Una nang gikanayon sa opisyal nga gina-manipula matud pa sa mga otoridad ang tinood nga ihap sa crime incidents sa Davao City aron nga magpabilin kining ubos.
