Giklaro ni National Bureau of Investigation o NBI Director Melvin Matibag nga dili “Bato” kundili “bakal” ang ilang nadakpan atol sa ilang pag-adto sa Davao City.
Mitumaw ang maong tubag taliwala sa mga espekulasyon nga posibleng dakpon si Senador Ronald “Bato” dela Rosa human miadto sa Davao ang mga operatiba sa NBI ug Presidential Anti-Organized Crime Commission o PAOCC niadtong Biyernes, Agosto 14.
Gipasabot ni Matibag nga miadto siya sa Davao isip kabahin sa hiniusang operasyon sa manufacturing plant sa Davao Mighty Steel Corporation sa Barangay Ilang, Bunawan District, nga miresulta sa pagluwas sa 174 ka Filipino nga trabahante.
Sumala pa ni Matibag, “bakal” ug dili “Bato” ang ilang nadakpan sa maong operasyon.
Sa kasamtangan, nag-atubang si dela Rosa og warrant of arrest gikan sa International Criminal Court o ICC human siya ginganlan nga usa sa mga kauban sa kanhi Presidente Rodrigo Duterte sa kaso sa crimes against humanity nga may kalabotan sa kampanya batok sa ilegal nga droga.
