DAVAO CITY – Nagpabilin sumala pa karon nga African Swine Fever (ASF) free ang siyudad sa Mati bisan nga apektado na karon sa susama nga sakit sa mga baboy ang kasikbit nga lalawigan sa rehiyon.
Sumala pa kang Mati City Veterinary Services Office head Dr. Marites Linsag Erispe nga pabilin nila karon nga gimonitor ang bisan unsa man nga insidente sa ASF infection sa ilang siyudad.
Kahinumduman nga ang Mati City Vet kaabag ang National Meat Inspection Service ug uban pang hingtungdan nga ahensiya sa kagamhanan sa pag-inspek sa nagkadaiyang meat shops ug markets sa siyudad ug nakumpiska ang gatusan ka mga pack sa processed meat products sama sa tocino ug chorizo nga ginabaligya nga walay tukma nga mga dokumento.
Sa usa ka shop nga girumbo, mikabat sa 418 packs sa chorizo ug 242 packs sa tocino gipangkumpiska ug gilubong gumikan sa kalapasan sa City Ordinance No. 71 series of 2011 ug Republic Act 9296 o Meat Inspection Code of the Philippines.
Laing shop sab ang nadiskobrehan nga namaligya ug meat products apan pakyas ang team nga makumpiska ang mga illegal products gumikan kay nasobrahan kini ug kagahi sulod sa freezer.
Apan misaad ang team nga mobalik aron masiguro nga makumpiska ang illegal products.
Mi-apela sab si Dr. Erispe sa tanan nga mga meatshop vendors, ilabi na sa mga online sellers nga siguruhon nga ang mga produkto nga ilang gibaligya ang dili maggikan sa mga areas nga adunay kaso sa ASF.
Mi-apela sab kini sa mga backyard hog raisers nga ipahibalo gikayon sa ilang buhatan sa higayon nga adunay mga baboy nga magkasakit.
Gitambagan sab niini ang mga hog raisers nga dili pakaonon ug lamaw ang mga baboy nga common sumala pa ang transmission sa ASF virus.
