DAVAO CITY – Nagpadayon karon ang panawagan sa Mati City Health Office (CHO) ngadto sa ilang mga residente nga kanunay manglimpiyo sa palibut ilabi na sa mga sagad nga puy-an sa mga lamok kini human nga misaka sumala pa ang kaso sa Dengue sa lugar ngadto sa 29 sulod lamang sa bulan sa Enero niining kasamtangan nga tuig diin lima niini ang kumpirmadong natakdan sab ug Covid-19 cases ug usa ang natalang namatay.
Sumala pa kang CHO Officer Dr. Ben Hur Catbagan Jr. nga siyam gikan sa 26 ka mga barangay ang apektado.
Ang nahisgutan nga dapit ang gilangkuban sa Barangays Central, Dahican, Dawan, Don Enrique Lopez, Don Martin Marundan, Don Salvador Lopez, Macambol, Matiao, ug Sainz. Gi-awhag sab niini ang publiko nga kinahanglan muhimo gilayon ug lakang aron nga dili mapaakan ug lamok nga nagdala ug dengue sama na lamang sa pagpanglimpiyo sa balay ug sa palibot.
Samtang gikanayon sa lokal nga kagamhanan nga ang City Epidemiology and Surveillance and Response Unit, rural health midwives, ug Barangay Health Emergency Response Teams (Bherts) ang mihimo na ug lakang aron nga makontrola ang dengue outbreak kini pinaago sa pag-edukar sa publiko, pagpahigayon ug spray sa mga panimalay ug pagpangita ingon man pagbungkag sa mga posibleng breeding pinuy-anan sa mga lamok.
Gitambagan sab ang mga residente nga gilayong magpa-check up sa higayon nga makasinate ug kalintura sulod na sa duruha ka adlaw.
Kinahanglan sab nga bantayan ang uban nga sintomas sama nalamang sa pagpanakit sa ulo, lawas, pagpamula sa panit, pagpanakit sa tiyan, sunggo ug fatigue.
