DAVAO CITY – Muabot sa 35 ka mga desktop computer units ang gidonar sa City of Mati LGU ngadto sa Department of Education – Mati City Division alang sa mga tulonghaang nagkinahanglan niini.
Gipahigayon ang pag-turnover atol mismo sa flag raising ceremony sa City Hall compound kaganihang buntag.
Anaa sa 17 ka mga tulonghaan ang makadawat sa maong desktop computers diin gilangkuban kini sa Mayor Luisito G. Rabat Memorial School, Rabat-Rocamora Mati Central SPED, Sudlon Elementary School, Dawan Central Elementary School, Macambol Elementary School, Magum Elementary School, Sanghay Elementary School, Talucanga Elementary School, Jose c. Martinez Jr. Elementary School, Matiao Central Elementary School, Tagabakid Elementary School, Taguibo Elementary School, Cabuaya Integrated School, Lanca Integrated School, Sanghay National High School, Licop Integrated School – Junior High ug City of Mati National High School.
Gawas sa mga desktop computers, lakip sab sa gitunol ang 3 ka electronic tablets ngadto sa DepEd Mati ingon man ang 19 ka aircon, usa ka armchair ug 177 ka health supplies.
Dako ang pagpasalamat ni Assistant Schools Division Superintendent Josie Bolofer sa lokal nga panggamahan tungod sa suportang gipaabot niini sa mga nagkinahanglang tulonghaan.
Gitambungan mismo sa mga representante sa recipient schools, DepEd City Division personnel, ug mga konsehal ning Syudad sa Mati ang maong pag turn-over.
