Gilauman nga magsugod na sa pag-operate og balik sa tuig 2026 ang Mati Airport human sa gipahigayon nga groundbreaking ceremony.
Nasayran nga gipahigayon ang seremonya uban ang mga dagkong opisyal sa dakbayan sa Mati ug probinsya alang sa katukuran sa maong proyekto nga adunay gigahin nga pondo nga mokabat sa P80 milyon nga airport development project.
Gumikan niini, lauman nga modagsa ang mga turista sa nasampit nga probinsiya ilabi na nga karong panahuna gikonsidira nga ang nasampit nga syudad og probinsya isip kabahin na sa tourist destinations nga magdala og kalambuan sa panginabuhian sa katawhan ug sa ekonomiya.
Nasayran nga dul-an lima ka dekada na ang nakalabay nga wala nahatagan og pagtagad ang nasampit nga tugpahanan nga ulahing nagamit usab kaniadtong panahon pa ni Pang. Marcos Sr.
Kung hingpit nga matapos ang pagtrabaho sa airport ug mga pasilidad niini, gilauman nga mamahimo kining matugpahan ug maluparan sa mga nagkadaiyang eroplano sama sa Airbus A320 ug uban pa.
Gikalipay usab kini sa mga katawhan sa dakbayan ug sa tibuok probinsya ang gihimong groundbreaking sa maong proyekto.
