Naggawas karon ang mas daghang ebidensiya sa mass killings o masaker nga gihimo sa paramilitary group nga Rapid Support Forces (RSF) sa el-Fasher, usa ka siyudad sa Darfur Region sa Sudan.
Lakip na niini ang makalilisang nga pagpamatay nga nahitabo sa usa ka maternity hospital sa el-Fasher niadtong weekend, diin gipatay sa mga RSF fighters ang 460 ka tawo, lakip na ang mga pasyente, ilang mga kauban, ug mga medical staff.
Subay sa video nga gipakatag ug gishare sa gobernador sa Darfur region, makita ang mga lawas sa mga biktima nga nagkatibulaag sa salog sa ospital nga naglunang sa dugo.
Sumala usab sa mga testigo, ang paramilitary group naglibot-libot sa mga balay ug gisakit o gipamatay ang mga sibilyan, lakip na ang mga kababayen-an ug mga bata.
Daghan usab ang namatay tungod sa bala samtang nagpaningkamot nga makalingkawas padulong sa luwas nga lugar.
Tungod niini, nanawagan ang World Health Organization (WHO) alang sa hinanaling ceasefire o pagtapos sa mass killings sa Sudan.
Samtang, gipanghimakak sa United Arab Emirates (UAE) ang mga ebidensiya nga nagsuplay kini og armas sa RSF.
Kahinumdoman nga duha na ka tuig sukad sa 2023 nga nagsugod ang gubat tali sa Rapid Support Forces ug Sudanese Military Forces, nga nakapatay na og kapin 40,000 ka mga tawo ug nagdala sa labing kagrabi nga humanitarian crisis sa kalibutan, nga nagpaikyas sa kapin 14 milyon ka mga indibidwal.
Nagsugod ang RSF sa pag-ilog sa el-Fasher niadtong Mayo 2024, ug giputol nila ang mga nag-unang agianan paingon sa siyudad.
Gi-anunsyo sa grupo nga ilahang hingpit nga nakontrol ang el-Fasher niadtong Domingo, Oktubre 26, 2025.
