DAVAO CITY – Laoman sumala pa nga mas mahal ang presyo sa Durian ug uban pang prutas atol sa Kadayawan Festival karung tuiga kung itandi sa milabay nga tuig gumikan sa limitado nga supply hatud sa sunod-sunod nga mga pag-ulan sa milabay nga bulan.
Matud pa kang Durian Industry Council of Davao City (DICDC) Chairman Larry Miculob, tinuod nga nakasinate karun ug limitado nga supply ang mga naninda ug prutas sama durian gumikan sa abnormalidad nga pag-ulan nga nasinatian kaniadtong bulan sa Marso ug Abril nga maoy hinungdan sa pagkahagbong sa mga bulak niini.
Nasayran nga Miculob nga ang dakbayan sa Davao maka-produce sumala pa ug 180 metric tons sa durian sa ulahing semana sa bulan sa Agosto hangtud na November season.
Apan karung tuiga, laoman sumala pa nga anaa lamang sa 120 metric tons sa durian ang ma-produce.
Sa kasamtangan anaa matud pa sa P120 hangtud na P200 ang matag kilo sa Durian apan mamahimo sumala pa kini nga moubos ngadto sa P60 o P100 per kilo.
Nasayran nga kaniadtong milabay nga tuig anaa lamang sa P40 ngadto na P50 ang matag kilo sa durian.
Hinuon aduna pa gihapoy nga prutas nga i-display atol sa Kadayawan apan mayorya sumala pa niini ang wala naggikan sa dakbayan inay sa mga kasikbit nga rehiyon sama sa Kidapawan o Davao del Norte.
Pipila sumala pa niini ang gilangkuban sa pomelo, lanzones, ug rambutan nga sagad naggikan usab sa North Cotabato.
