Misugot na ang gobyerno dinhi sa Pilipinas sa panukala nga transfer procedure sa Indonesia, alang sa repatriation ni Mary Jane Veloso, diin gikanayon kini sa senior minister for law ang human rights affairs sa Indonesia kagahapong adlawa.
Sumala pa ni Yusril Ihza Mahenra, pirmahan kini niya ug sa iyahang Philippine counterpart ang maong kasabutan ug pagalauman na ang pagpauli ni Veloso sa Pilipinas, ayha mag-Pasko.
Kahinumdumang, niadtong nakalabayng bulan, misugot ang Indonesia nga i-repatriate si Veloso nga nakuhaan matud pa kini og 2.6 kilo nga heroin niadtong 2010 diin gitago niini sa usa ka maleta.
Hapit sab kini gihukman og silot nga kamatayon si Veloso, apan nakadawat lamang kini og last-minute reprieve niadtong 2015.
Gikanayon ni Yusril nga misugot na sumala pa ang Pilipinas sa ilahang terms nga gipanukala sa Indonesia, lakip na ang pagrespeto niini sa sentensya sa Indonesian Court ngadto kang Veloso ug sa status niini isip piniriso sa Indonesia.
Samtang, respetuhon sab sa Indonesia ang bisan unsang paghimoong desisyon sa Pilipinas, ugaling makauli na si Veloso sa nasud, lakip na ang paghatag niini og clemency.
Bawal na sab nga mubalik si Veloso sa Indonesia.
Human sa nahimong pirmahanay, makighinabi ang Indonesia ug Pilipinas alang sa teknikalidad sa pagpabalhin kang Veloso, diini lakip sab sa ilahang pagahisgutan mao ang petsa sa pagpauli niini.
