DAVAO CITY – Malampuson ang gipahigayon nga maritime pollution exercise (MARPOLEX) 2018 sa Davao Gulf kagahapong adlawa sa Philippine Coast Guard (PCG) District Southeastern Mindanao.
Tumong niini nga mapalig-on ang kapasidad sa PCG partikular na ang inter-operability sa ahensiya aron nga ma-address ang posibleng oil spill nga mahitabo.
Matud pa kang Colonel Marco Gines, acting deputy commander sa PCG Eastern Mindanao, gihimo nila ang maong aktibidad aron nga masiguro nga kung adunay mahitabong oil spill sa Davao Gulf, andam ang floating assets, equipment ug mga personahe aron nga mapugngan ang susama nga bahad sa kinaiyahan.
Gisalmutan ang maong aktibidad sa private stakeholders ilabi na ang mga kompanya diin ang ilang mga negosyo adunay kalabutan sa oil.
Gi-obserbahan ang maong aktibidad sa mga sakop sa Davao City Government Maritime Coordinating Council, Public Safety and Security Command Center (PSSCC), Task Force Davao (TFD) ug uban pang mga ahensiya.
Bisan nga aduna pay kakulangon, ipadyaon pa gihapon nila ang pagpahigayon ug exercise ug palambuon ang level sa ilang kaandam.
