Nagtuo si World Boxing Council (WBC) President Mauricio Sulaiman nga magpabilin gihapon ang kainit sa boxing ring sa umaabot nga sangka ni Filipino boxing icon Manny Pacquiao batok kang Mario Barrios.
Matod niya, wala siya’y pagbasol nga gitugotan niya si Pacquiao nga mohagit kang Barrios alang sa WBC welterweight title nga ipahigayon sa MGM Grand sa Las Vegas.
Gibutyag ni Sulaiman ang ilang gihimong proseso, nga unang lakang mao ang pagpailawom ni Pacquiao sa medical examinations nga iyang malampusong napasa, ug nakadawat usab siya og lisensiya gikan sa komisyon.
Gipasabot niya nga ang Nevada usa sa mga estado nga adunay labing hugot ug respetadong boxing commission sa tibuok kalibutan.
Giaprobahan usab sa WBC Board ang welterweight title fight ni Pacquiao batok kang Barrios.
Nahimong emosyonal pa daw si Pacquiao dihang gitawagan siya ni Sulaiman, tungod kay ang una niyang championship belt kaniadto mao ang WBC flyweight ug karon, challenger na siya balik sa WBC welterweight.
Giwagtang usab ni Sulaiman ang mga pagduha-duha kang Pacquiao tungod sa iyang edad nga 46 anyos, nga matod sa uban wala na’y ikapakita.
Apan giingon ni Sulaiman nga ang boxing usa ka contact sport, ug nakita niya nga si Pacquiao walay bisyo sama sa pag-inom og bino ug dili sab sobra ang lawas hinungdan nga kondisyon gihapon ang lawas ni Pacquiao hangtod karon.
