Nagpahigayon ang Archdiocese of Manila ug prayer vigil alang sa paspas nga pagkaayo ni Pope Francis kagahapong adlawa, Biyernes, Pebrero 21.
Sa usa ka pamahayag, ang Archdiocese nagkanayon nga isip tubag sa panawagan ni Arsobispo Charles John Brown, ang Apostolic Nuncio sa Pilipinas, sa pag-ampo alang sa paspas nga pagkaayo sa Santo Papa ingon man sa tanan nga mga doktor ug nurse nga nag-atiman kaniya, ang mga matouhon misalmot usab sa prayer vigil alang kang Pope Francis pasado alas 5 sa hapon kagahapong adlawa.
Una nga nanawagan si Manila Archbishop Jose Cardinal Advincula sa tanan nga parokya ug komunidad sa Archdiocese of Manila sa pag-organisar ug Holy Hour for the Healing of the Sick, ilabi na sa Santo Papa.
Nanawagan usab si Arsobispo Advincula sa mga matouhon sa paghalad og personal ug pamilya nga pag-ampo alang sa susama nga katuyoan.
Ang 88-anyos nga pontiff kasamtangan nga na-confine sa Gemelli hospital sa Roma human na-diagnose nga adunay double pneumonia, nga nagpasabot nga apektado ang duha niini ka baga.
