Nagtagbo sa unang higayon si Department of Foreign Affairs (DFA) Sec. Enrique Manalo ug ang counterpart niini nga si US Secretary of State Marco Rubio sa sidelines sa Munich Security Conference sa Germany.
Diin gihisgutan sa duha ka opisyal ang nagpadayon nga bilateral nga koordinasyon tali sa US ug Pilipinas sa pagtubag sa destabilizing nga aksyon sa China bahin sa gilalisan nga kadagatan ug sa nagkadako nga kooperasyon sa ekonomiya sa imprastraktura, kritikal nga minerales, information technology ug enerhiya, lakip na ang pinaagi sa civil nuclear cooperation, subay sa usa ka ‘readout’ gikan sa tigpamaba sa US State Department nga si Tammy Bruce.
Matud niini, nga dili lamang gipasiugda ni Sec. Rubio ang pasalig sa America sa pakig-alyansa niini sa Pilipinas, apan gipasiugda usab niini ang dugang pagpalig-on sa giingon nga “invested and enduring relationship” tali sa duha ka nasud.
Ang panagtagbo sa duha ka langyaw nga mga kalihim nahitabo hapit usa ka buwan human ang duha nag-istoryahanay sa usa ka tawag sa telepono kaniadtong Enero 22, bahin sa estado sa depensa ug seguridad nga kooperasyon, lakip niini ang suporta alang sa modernisasyon sa depensa sa nasud ug ang kahimtang sa gilalisan nga kadagatan diin ang Pilipinas ug China adunay mga maritime claims.
Una nga gipamatud-an ni Rubio ang lig-on nga mga pasalig sa America ngadto sa Pilipinas human kini gitudlo ni US President Donald Trump.
Kahinumdoman nga si DFA Sec. Manalo maoy mag-host sa 61st Munich Security Conference atong milabayng adlaw, diin ang nag-unang forum sa kalibotan alang sa pagdebate sa internasyonal nga polisiya sa seguridad ug usa ka lugar alang sa mga diplomatiko nga inisyatibo aron matubag ang dinalian nga mga problema sa seguridad sa kalibutan.
