DAVAO CITY – Balhug na bilanggo-an ug gihikay na ang kaso batok sa managtrato human sila gipangdakop sa pagpatuman sa search warrant sa R. Castillo, Agdao, Davao City kaganinang buntag.
Ang mga dinakpan giila nga sila si Loenel Piyaw, ulitawo nga maoy target sa search warrant ug hinigugma niini nga usa ka Emma Ignacio, minyo nga gipangdakop sa Criminal Investigation Detection Group (CIDG) Davao City Field Unit ug Sta. Ana Police Station.
Sa impormasyon nasayran nga namaligya matud pa ug armas si Piyaw rason nga gisilbi ang search warrant nga gi-isyu sa korte batok niini ug didto nakuha ang duha ka .38 revolver lakip mga bala.
Nahilakip sa search warrant ang duha usab ka .45 caliber apan wala na kini maabtan sa CIDG.
Atol sa operasyon nag-eskandalo matud pa ang duruha dungan sa pag-atake sa operatiba ug nagdumili sab nga maaresto.
Gawas sa pagsupak sa R.A 10591 o Comprehensive Firearms and Ammunition Regulation Act nga gipasaka batok kang Piyaw nag-atubang sab karon ang duha ug Direct Assault and Disobedience ug Obstruction of Justice.
Sumala pa ni Police Major Milgrace Cajes Driz ang labaw sa CIDG-Davao City nga sakop matud pa si Piyaw sa Avila Crime Group nga nalambigit sa gun running activity ug drug peddling sa Calinan area ning dakbayan.
Sumala ni Driz nga padayon matud pa ang ilang buhatan sa kampanya batok sa kriminalidad sanglit mao kini ang ilang mandato.
