DAVAO CITY – Nanawagan ang Management of the Dead and Missing (MDM) Unit sa mga residente nga adunay mga sakop sa pamilya sa mga nangawala sa pagkooperar sa mga awtoridad alang sa tukma nga pagkonsolida ug pag-verify sa mga patayng lawas.
Giklaro sa Unit nga mahimong ipasangil sa post-mortem examination sa National Bureau of Investigation Disaster Victim Identification (NBI-DVI) ang inconsistent missing persons data nunot sa Masara landslide sa Zone 1, Brgy. Masara, Maco, Davao De Oro.
Sumala ni MDM Unit spokesperson Lea Añora, kasamtangang nagpahigayon og “tagging” ang ahensya gikan sa ground zero hangtod sa collection area aron unang mailhan ang patayng lawas, apan i-validate sa NBI-DVI ang datos ug mga sakop sa pamilya nga personal nga mokompirmar sa pagkatawo sa narekober nga lawas.
Dugang pa nga labing minos 14 ka mga lawas ang temporaryong gilubong sa Maco Public Cemetery samtang nagpaabot sa kompirmasyon ug pagkaayo sa mga sakop sa ilang pamilya.
Upat pa lamang ang wala pa mailhi nga patayng lawas diin unang giendorso niadtong Pebrero 16 ang duha ka mga narekober nga kumpleto ang lawas, samtang gidala sab kaniadtong Pebrero 17 ang mga narekober nga parte lamang sa lawas. Apan ipaubos sa DNA sampling kadtong mga bangkay nga wala ma-claim human sa 72 ka oras gikan sa pagrekober.
Sumala sa PDRRMO Davao de Oro, miabot na sa 98 ang mga nakuha nga mga patayng lawas sa nagpahinabong retrieval operation sa may Zone 1, Brgy. Masara, Maco, Davao De Oro.
Miubos sa walo ang mga natala nga missing samtang nagpabiling anaa sa 32 ang mga nasamdan sa insidente.
