DAVAO CITY – Mamahimo na nga mag-atubang ug mas bug-at nga multa kadtong mga pasahero ug mga indibidwal nga planong mameke sa ilang i-presenta nga Covid-19 reverse transcription polymerase chain reaction (RT-PCR) negative results sa higayon nga moabot ang mga nahisgutan gikan sa ilang biyahe.
Kahinumduman nga sa gipagawas nga pahimangno sa lokal nga kagamhanan, kinahanglan na nga mobayad ug kantidad nga P42,000 ang mga masikop sa otoridad nga mag-presenta ug peke nga RT-PCR test.
Tin-aw sumala pa nga kalapasan sa Article 172 of the Revised Penal Code o “Falsification by Private Individuals and Use of Falsified Documents” ang susama nga lakang diin tugbang niini ang multa nga P36,000, ingon man kalapasan sa Section 9 Paragraph B sa Republic Act 11332 o “Tampering Of Records Or Intentionally Providing Misinformation” ilalom sa Executive Order (EO) 63-B nga adunay multa nga P6,000.
Kahinumduman nga pipila na ka mga pasahero ang nadakpan sa davao airport human nga nag-presenta ug peke nga mga RT-PCR test results samtang ang uban biktima sa scam.
Kalakip sa mga nasikop ang usa ka sundalo ug police official.
