DAVAO CITY – Mipatigbabaw ang kalinaw sa dakbayan sa Davao walo ka adlaw human gipatuman ang martial law sa tibuok isla sa Mindanao.
Sumala pa kang Davao City Police Office (DCPO) Director Police Senior Supt. Alexander Tagum nga napugngan sa martial law ang mga street crimes gumikan sa kinalusad nga oplan bolabog sa kapolisan.
Gumikan niini mas nagtuo ang mga tinugyanan sa balaod nga mas luwas karon ang dakbayan tandi ngadto sa milabay nga mga panahon. Dugang pa niya nga nakatabang sab ang martial law sa pagpatuman sa Iron City, diin kaabag niini ang 910 ka mga Volunteer Police Auxiliary.
Wala’y gikatala nga dagku nga mga krimin sa dakbayan, apan ubay-ubay ang mga nangadakpan gumikan sa paglapas sa Republic Act 4136 Land Transportation code of the Philippines ug sa Comprehensive Anti-Smoking Ordinance.
Samtang sumala pa kang Police Chief Supt. Manuel Gaerlan, Police Regional Director nga nahimong paborable sa dakbayan sa Davao ug sa rehiyon unse ang pagdeklara sa Martial Law.
Gipasalig sa ilang han-ay nga wala’y himoon nga pagpangabuso sa ilang bahin ang kapolisan sa rehiyon ug hinoon segurohon nga luwas ang tanan nga mga katawhan.
