Gipasalig sa Malacañang nga magpabiling lig-on ang presyo sa mga nag-unang palaliton sa nasud hangtod Abril 16, 2026. Kini misunod sa malampusong pakiglambigit sa Department of Trade and Industry (DTI) uban sa mga dagkong manufacturer.
Sa press briefing sa Malacañang, gitaho ni Palace Press Officer Undersecretary Claire Castro nga ang maong kasabutan kabahin sa programang Unified Package for Livelihoods, Industry, Food, and Transport (UPLIFT) sa administrasyong Marcos.
Matud pa ni Castro, base sa report ni Trade Secretary Cris Roque ngadto kang Pangulong Ferdinand Marcos Jr., misaad ang mga manufacturer nga dili sila magpatuman og pagsaka sa presyo hangtod Abril 16, 2026.
Isip kabahin sa pagbantay, magpatuman ang DTI og weekly monitoring sa mga tindahan.
Gilauman usab ang sunod nga pakigpulong ni DTI Secretary Cristina Aldeguer-Roque sa mga producer ug manufacturer aron masiguro nga dili mosaka ang presyo sa mga palaliton bisan pa sa padayon nga pagsaka sa presyo sa lana tungod sa tensyon sa Middle East.
Giangkon ni Castro nga bisan adunay mga puwersa sa global nga merkado nga dili makontrol sa gobyerno, buhaton sa tanang ahensya ang ilang makaya aron dili kini mahimong bug-at nga palas-anon sa mga katawhan.
