Gipasabot sa Malacañang kung ngano nga zero budget ang nadawat sa Ayuda sa Kapos ang Kita Program o AKAP sa 2026 proposed national budget. Sumala ni Palace Press Officer Usec. Claire Castro, base kini sa pahayag sa Department of Budget and Management (DBM) nga aduna pay daghang pondo nga nabilin gikan sa budget sa AKAP karong fiscal year 2025.
Singon ni Castro nga sa P26 bilyon nga pondo nga gitagana, P13 bilyon pa lamang ang nagamit, ug aduna pay kapin sa tunga o P13 bilyon nga wala pa magamit alang sa maong programa. Dugang pa niini, kinahanglan usab nga hatagan ug prayoridad ang ubang mga programa nga mas gikinahanglan og pondo. Target sa AKAP ang mga minimum-wage earners isip mga benepisyaryo.
Nahisgotan nga nahimong kontrobersyal ang AKAP tungod sa mga alegasyon sa political manipulation, diin giingon sa mga kritiko nga gigamit kini sa pipila ka pulitiko aron makakuha og political loyalty. Apan gibarogan sa Department of Social Welfare and Development (DSWD) nga dili pork barrel para sa mga kongresista ang pondo sa AKAP.
