DAVAO CITY – Gibutyag sa Malacañang nga walay “preferential treatment” nga ihatag sa kanhi head sa Davao City Information Office (CIO) nga Jefry Tupas kinsa una ng gilambigit sa nahitabong drug raid sa usa ka beach resort sa Davao de Oro.
Una ng gibutyag ni Presidential Spokesperson Harry Roque nga walay basehan ang gikanayong ginalipdan sa gobyerno si Tupas nga iladong suod nga higala ni Davao City Mayor Inday Sara Duterte-Carpio.
Gitataw sab ni Roque nga dili si Tupas ang “key personality” sa anti-drug operation nga gipahigayon sa Philippine Drug Enforcement Agency (PDEA).
Gawas niini, gihatagan na sab sumala pa ug katin-awas sa PDEA nga walay search warrant o arrest warrant nga gi-isyu batok kang Tupas.
Kahinumduman nga anaa sa 17 party-goers ang nasikop sa PDEA-11 kauban ang National Bureau of Investigation ug Mabini Municipal Police Station sa ilang gipahigayon nga buy-bust operation sa beach resort sa Pindasan sa Mabini, Davao de Oro usa ka semana na ang milabay diin anaa sa kapin usa ka milyon ka pesos nga kantidad sa mga illegal nga druga ang narekober gikan sa mga nahisgutan.
