DAVAO CITY – Gipasalig sa pamunoan sa Davao City Police Office (DCPO) nga magpatuman ug hugtanon nga seguridad sa siyudad ug tutokan ang mga aktibidad sa kaigsuonan nga muslim dungan sa ilang pagsaulog sa Ramadan.
Una ng gibutyag sa DCPO spokesperson Capt. Rose Aguilar nga gatusan ka mga sakop sa kapulisan sa nagkadaiyang police station sa siyudad ang gipakatag sa mga nagkadaiyang moske sa siyudad kini aron masiguro nga malinawon nga mapahigayon sa mga kaigsuonan nga muslim ang ilang mga aktibidad.
Gawas sa mga kapulisan, kalakip sab sumala pa sa ipakatag ang mga police auxiliary. Sama sa naandan sa siyudad, adunay ihatag sab nga food packs ang lokal nga kagamhanan sa muslim community diin mangunay sa paghatud niini ang mga sakop sa kapulisan.
Gawas sa kahusay ug kalinaw, buot lamang sab sa otoridad nga mapabilin ang pagpatuman sa health protocols sulod sa mga moske.
Una ng nasayran nga gihatagan sab karon ug konsiderasyon sa DCPO ang ilang mga kaubanan nga muslim nga nakighiusa sab sa ilang tuig nga aktibidad.
