Gikumperma na ni National Bureau of Investigation (NBI) Director Jaime Santiago nga adunay pipila ka kaso na ang gipasaka nila sa vlogger nga si Claire Contreras o mas na-ila nga si “Maharlika” ug kang kanhi presidential spokesperson Atty. Harry Roque.
Gipangunahan sa NBI Cybercrime Division ang pagpasaka ug kaso gumikan sa pagpakatag sa duha ka “polvoronic” video kuno ni Pangulong Ferdinand Marcos jr. Ang nahisgutang video ang gi-post sa social media ni Contreras ug kini ang mikatag. Kahinumduman nga niadtong Marso 13 ning kasamtangang tuig, gi-angkon ni Maharlika nga siya ang nagpaluyo sa pagpakatag sa video.
Samtang si Roque sa gihimo niining video stream, gi-awhag niini ang publiko nga pakigbatukan ang gobyerno. Nag-atubang karon si Maharlika ug mga kasong Unlawful Use of Means of Publication and Unlawful Utterances, Inciting to Sedition, Cyber Libel, ug Computer-Related Forgery, samtang si Atty. Roque ang nag-atubang sa kasong sedition.
