DAVAO CITY – Walo ka oras nga sirhan ang Maharlika Highway gikan sa Water Front Hotel hangtud sa Panacan Barangay Hall gikan alas 4:00 sa kaadlawon hangtud sa alas 12:00 sa udto karong Dominggo.
Ang nahisgutan nga pagsira may kalabotan sa ipahigayon nga Phenom 51.5 Triathlon.
Himoon ang 1.5 ka kilometro nga Swim Course sa Water Front Hotel sa Lanang. Sa maong dapit sab manukad ang 40 ka kilometros nga bike course padulong na sa Barangay Hall sa Panacan ug pabalik.
Samtang ang 10 kilometer Run nga padulong sa Samal Ferry Wharf ug pabalik sa Lanang.
Gumikan niini gisugyot sa City Transport and Traffic Management Office (CTTMO) sa pagpanguna ni Chief Deonesio Abude nga mobiyahe padulong sa Norte agi sa Milan, Cabanti-an, Indangan, Acacia ug lusot na sa Tibungco ug Bunawan.
Samtang ang mga dagko nga mga truck gikan sa Norte padulong dinhi sa dakbayan sa Davao mamahimo nga mo-agil sa Elyong, Tibungco.
Ang dili kayo dagko nga mga sakyanan mamahimo nga mo-agi sa Bunawan ug ang light vehicles mamahimo nga mo-agi sa Malagamot, Panacan padulong na sa Cabanti-an ug Millan, Buhangin, ning dakbayan sa Davao.
Nasayran nga mokabat ngadto sa 162 ka mga personahe CTTMO ang i-deploy alang sa Phenom Triathlon nga dunay kapin sa kwatrosientos ka mga sumasalmot.
