Gisirado sa awtoridad ang Magtuod-Tugbok Road sa Barangay New Carmen, Davao City human sa nahitabong mass wasting nga gituohang resulta sa walay hunong nga pag-ulan sa lugar. Gikumpirma kini ni City Disaster Risk Reduction and Management Office (CDRRMO) Chief Alfredo Baluran sa usa ka panaghisgot.
Matod ni Baluran, nidahili ang yuta ug pondasyon sa dalan sa Purok 2, Barangay New Carmen, nga nagbutang sa peligro sa tanang motorista nga moagi unta niini. Girekomenda sa ilang buhatan ngadto sa City Transport and Traffic Management Office (CTTMO) ang temporaryong pagsira sa kalsada aron malikayan ang disgrasya ug mapadali ang pag-ayo niini.
Busa giabisuhan ang tanang motorista nga mangita og alternatibong agianan samtang padayon ang trabaho sa mga otoridad. Magpabilin nga dili passable ang maong dalan hangtod matapos ang repair ug mahatagan og clearance gikan sa mga ahensyang nagtan-aw sa kahimtang sa kalsada.
