DAVAO CITY – Naka-admit na karon sa Southern Philippines Medical Center (SPMC) ang inang nakumpirma nga kaso sa coronavirus disease (Covid-19) dinhi sa dakbayan sa Davao aron nga malikayan nga maka-infect sa uban nga tawo human nga migula ang resulta pito ka adlaw human nga nakuhaan sila ug samples.
Una ng gibutyag ni Davao City Mayor Sara Z. Duterte-Carpio nga subay sa report nga gipadala sa Department of Health (DOH), mihangyo sumala pa ang magtia-yon nga magpa-admit sa hospital. Una ng nagpadayag ug kadismaya si Mayor Inday human nga nasayran nga ang mga nagpositibo sa Covid-19 dinhi sa dakbayan ang anaa lamang sa ilang panimalay.
Gitino sa Mayor nga ang mga Patients under Investigation (PUI) ginatugtan nga mouli sa ilang panimalay apan kinahanglan nga mag-self-quarantine samtang naghhulat sa resulta.
Kung si Mayor sumala pa ang pasulti-on, dili niya buot nga dad-on sa hospital ang magti-ayon inay magpahimutang na lamang ug pulis duol sa balay diin kini nahimutang aron nga dili makagawas.
Wala na mihatag ug dugang detalye ang DOH-Davao Region kalabot sa magti-ayon gawas lamang sa travel history ug health condition sa mga nahisgutan.