Nitay-og ang pipila ka bahin sa Cordillera ug Northern Luzon human natala sa Philippine Institute of Volcanology and Seismology (PHIVOLCS) ang Magnitude 4.5 nga linog karong Hulyo 9, 2026, alas 2:33 sa hapon. Sumala pa sa PHIVOLCS, ang sentro sa linog nahimutang sa siyam ka kilometro sa habagatan-kasadpan sa Tuba, Benguet, ug adunay giladmon nga 10 ka kilometro.
Dugang pa niini, gibati ang pagtay-og sa nagkalain-laing lugar sa Cordillera ug Northern Luzon. Lakip sa instrumental intensities nga narekord ang Intensity V sa Baguio City, Intensity IV sa Aringay, La Union, Intensity III sa Sison, Pangasinan, Intensity II sa Urdaneta City, Pangasinan, ug Intensity I sa Cuyapo ug Lingayen, Pangasinan.
Matud pa sa PHIVOLCS, wala pa’y nadawat nga opisyal nga report sa mga kadaot o mga tawo nga naangol tungod sa maong linog. Sa kasamtangan, padayon nga gisubay sa mga otoridad ang kahimtang aron masuta kon adunay mahimong epekto sa mga naapektuhang lugar.
Giapelar usab sa PHIVOLCS ang publiko nga magpabiling mabinantayon ug mosunod sa mga earthquake safety protocols, ilabina sa mga lugar nga kanunay makasinati og paglinog ug posible nga aftershocks.Kahinumduman, kabahin ang Pilipinas sa Pacific Ring of Fire, maong usa kini sa mga nasud nga kanunayng makasinati og mga paglinog ug kalihokan sa mga bulkan tungod sa aktibong mga fault line ug tectonic plates sa rehiyon
