Padayon karon ang gihimong imbistigasyon kapulisan kabahin sa pagkamatay sa mag-inahan sulod sa ilahang balay nga nakaplgan kagahapong adlawa sa munisipalidad sa Nabaunturan Davao De Oro.
Girespondehan gilayon sa mga otoridad ang nadawat nga report kabahin sa nakaplagan nga patay’ng lawas sa mag-inahan sa Prk. 2-A, Brgy. Katipunan, kagahapon sa hapon.
Gibana-banaan nga usa ka adlaw na nga patay ang mga biktima nga giilang si Janice Amellanes ug iyang 12 anyos nga anak.
Sumala sa inisyal nga impormasyon, nadiskubrehan ang duha ka mga biktima sa dihang mibisita sa balay ang uyoan sa bata.
Gibutyag sa pipila ka mga residente, aduna sumala pa’y nakita nga mga samad ang likod sa inahan ingon sa anak niini.
Ginasubay na usab ang mga narekober nga butang sulod sa panimalay nga gituohan iya sa suspetsado.
