Laraw karon sa Land Transportation Office (LTO) nga ipatuman ang number coding scheme isip temporaryo nga lakang aron masulbad ang trapik sa Davao Region.
Sumala pa ni LTO assistant secretary Vigor D. Mendoza II, nga ang number coding system usa ka ‘short-term solution’ sa pipila ka mga estratehiya nga ilang ginaplano aron masolbad ang trapik sa mga lugar.
Dugang pa niini, nga aron mamahimong epiktibo nga masulbad ang trapik, dili lamang ‘number coding’ ang ipatuman, apan, kinahanglan matud pa og kombinasyon sa pipila ka mga solusyon.
Gibutyag usab ni LTO-Davao Regional Director, Atty. Ernesto Raphael Robillo, nga ang ilang opisina nagaplano na og dugang nga pamaagi aron masuta ang kabug-aton sa trapiko.
Dugang pa sa opisyal nga mamahimo sumala pa nga sundon ang coding system kung diin ang sakyanan magamit lamang sa gikatakna nga adlaw subay sa plaka niini, ug pag-abot sa rush hour, pilion lamang ang mga sakyanan nga magdagan sa kalsada.
Usa sab sa mga laraw niini mao ang pagsiguro nga ang mga sakyanan nga balido ug rehistrado lamang ang makagamit sa kalsada.
Gipasabot usab ni Robillo nga ang pagdili sa mga ‘unregistered vehikols’ sa kalsada, dako og tabang sa pagpaluag sa dagan sa trapiko.
Kahinomduman nga nakadakop ang LTO og 1,804 ka mga ‘unregistered vehikols’, diin ang labing daghan niini mao ang motorsiklo nga anaa sa 1,187, gisundan kini sa mga pribadong sakyanan nga anaa sa 160, ug 144 ka mga SUVs.
