DAVAO CITY – Gipahimangnoan sa Metro Davao Taxi Operators Association (MDTOA) ang mga taxi drivers ning dakbayan sa Davao nga illegal ang pagpasakay sa ilang mga higala o kaila sa higayon nga aduna na silay mga pasahero.
Tipik lamang ang pahayag sa nahisgutan nga grupo human nga nakadawat sila ug reklamo sa usa ka pasahero.
Matud pa kang MDTOA president attorney Rogelio Largo, wala nila ginatugot ang nahisgutan nga pamaagi sa mga Taxi driver kini aron nga ma-protektahan ang seguridad sa pasahero nga unang misakay.
Supak sab sumala pa kini sa regulasyon nga gipatuman sa Land Transportation Franchising and Regulatory Board (LTFRB).
Nanawagan ang nahisgutan sa mga pasahero nga kung makasinate sila ug susama nga insidente, mamahimong moduso sila ug reklamo sa LTFRB office.
Mamahimo sab nga isumite sa pasahero ang pangalan sa driver ngadto sa LTFRB.
Nasayran nga subay sa gipahigayon nga annual clearance system sa LTFRB, nga ang mga driver nga adunay nahimong daghanan nga kalapasan dili na tugutan nga makamaneho ug public utility vehicle.
