Giaprobahan sa Land Transportation Franchising and Regulatory Board o LTFRB ang kinatibuk-ang 141,724 ka units sa passenger jeepneys ug UV Express alang sa P10 kada litro nga fuel discount subsidy sa gobyerno.
Matod ni Vigor Mendoza II, ang maong ihap naglangkob sa tanang rehiyon base sa ilang database sa mga kwalipikadong benepisyaryo diin 12,688 na ang nakarehistro og malampusong transaksyon.
Plano usab nga palapdan kini aron maapil ang uban pang public utility vehicles o PUVs.
Ang fuel discount subsidy unang gilusad sa pinili nga gasoline stations sa Metro Manila pinaagi sa pakigtambayayong sa Department of Energy, ug karon gipatuman na kini sa tibuok nasod sa 4,299 ka participating gasoline stations gikan sa una nga 50 stations sa National Capital Region.
Sa pagkakaron, naka-apud-apud na ang gobyerno og sobra P13.3 milyon alang sa discount subsidies.
Gawas sa P10 kada litro nga discount, giaprobahan usab ni Pangulong Marcos Jr. ang P5,000 fuel subsidy alang sa mga PUV drivers ug operators, lakip na ang service contracting program aron mas matabangan pa ang mga pasahero.
Ang mga PUVs lamang nga adunay valid franchises ang mahimong makaapil.
Ang fuel subsidy adunay limitasyon nga 150 litros matag semana kada unit ug kung makumpirma na ang license plate, awtomatikong maaplikar ang discount.
