DAVAO CITY – Gikabutyag sa opisyal sa LTFRB 11 nga taliwala sa hangyo sa mga draybers sa jeep nga pausbawan ang hangyo sa plitihan didto sa kaulohan, wala pay nadawat bisan usa ka petisyon dinhi sa rehiyon mahitungod sa pag-pausbaw sa plitihan sa mga pampublikong sakyanan.
Sumala sa regional director sa buhatan nga si Nonito Llanos III atol sa pakighinabi sa Bombo Radyo Davao, sukwahi didto sa Metro Manila nga aduna nay nadawat ang main office og mga petisyon aron pausbawan ang hangyo sa plitihan gikan sa mga nagkalain-lain nga mga grupo sa transportasyon.
Alang kang Llanos, daghan nga ginalantaw ang central office o ang LTFRB nga ilang kinahanglan usa tun-an mahitungod niini diin lakip ang National Economic and Development Authority (NEDA) nga mulantaw kung unsa ang mamahimong epekto niini sa ekonomiya sa Pilpinas ingon man “justifiable” nga presyo sa pamasahe.
Sa pikas bahin, namatikdan usab sa dakbayan sa dabaw ang pipila ka mga abusado nga mga PUJ draybers nga musingil og pleti nga labaw pa sa gipatumang taripa sa ilang buhatan.
Gikanayon ni Llanos nga gimanduan na niini ang communication department sa maong buhatan nga sutahon ang mga reklamo nga ilang nadawat mahitungod niini ug sa dihang mapamatud-an, gilayon usab kini aksyonan sa LTFRB aron nga dili maanad ang mga abusadong draybers.
Nanawagan usab ang nahisgutan ngadto sa katawhan, kung uggaling makasinati og pagpangabuso gikan sa mga PUJ ug PUV draybers, ilabi na pagkolekta og plitihan gikan sa pasahero, mamahimong mukontak sa LTFRB XI pinaagi sa ilang opisyal nga Facebook page.
via || Bombo HJR & Bombo LJF
