DAVAO CITY – Kasamtangan nang giatiman sa Land Transportation Franchising Regulatory Board (LTFRB) 11 ang guidelines sa laing hugna sa fuel subsidy program alang sa mga driver ug operators sa mga pampublikong sakyanan sa dakbayan sa dabaw.
Gikanayon ni LTFRB 11 regional director Nonito Llanos III, nga ilalom sa bag-ong gimugan nga guidelines sa ilang buhatan, mamahimong makadawat ug subsidiya dili lamang ang mga driver sa PUJ ug FilCab kung dili lakip na ang mga driver/operators sa taxi, bus, truck-for-hire ug mga pedicab.
Sumala pa ni Llanos, ginahulat na lamang karon department of transportation ang pondo gikan sa Department of Budget and management alang sa nahisgutang programa subay na usab sa padayon ug walay hunong nga pagsaka sa presyo sa mga produktong lana.
Sa kasamtangan, daghan na sa mga PUV driver sa syudad ang nakadawat sa ilang pantawid pasada program PPP cards alang sa ilang fuel subsidy sa tuig 2021, ug gani nagpadayon pa ang pag-release sa LTFRB 11 alang niadtong mga wala pa makakuha karong panahona.
Mamahimo ng makuha ang PPP card sa buhatan sa LTFRB 11 o kaha sa land bank of the Philippines.
