DAVAO CITY – Gipasabot sa Land Transportation Franchising and Regulatory Board (LTFRB) nga mandato na sugod kagahapon ang pagsuot ug face shields o eye protectors sa public transports.
Sa gipagula nga memorandum circular ang mga drivers, conductors ingon man mga pasahero sa public utility vehicles (PUVs) sa mga areas latas sa nasod ilalom sa general community quarantine (GCQ) kinahanglan nga mosuot ug face shield o eye protector, gawas sa pagsuot ug face masks.
Kalakip sab sa kamandoan nga kung pakyas ang pagsuot ug face mask ingon man face shield o eye protector, adunay igong rason nga dili pasakyon sa PUV.
Gipasabot ni LTFRB-Davao Director Armand Dioso nga epektibo gilayon nga ipatuman ang mandatory wearing of face shield o eye protector nga kabahin pa gihapon sa pagpaningkamut aron nga makunhuran ang kaso sa Covid-19.
Sa kasamtangan, nagpadayon sumala pa ang LTFRB sa pagpahigayon ug information dissemination sa tanan nga mga drivers, conductors, ug pasahero aron nga masayod ang mga nahisgutan sa bag-ong riding policy.
