Girekomenda na sa House Committee on Good Government and Public Accountability sa Department of Justice (DOJ) nga magpaguwa og lookout bulletin order (LBO) batok sa pito ka mga opisyal sa Office of the Vice President (OVP) labot sa mga imbestigasyon nga aduna matud pay mga iregularidad sa paggamit sa confidential funds niadtong 2022 ug 2023.
Gimugna sa chairman sa maong komite nga si Manila 3rd District Rep. Joel Chua ang maong sugyot, human nga gipaguwa ang subpoena aron nga muatubang ang mga opisyal ni VP Sara aron maghatag og testimonya human nga wala kini misipot sa unang pagdungog.
Lakip sa mga opisyal mao sila OVP Chief of Staff Zuleika Lopez; Assistant Chief of Staff ug Chair sa Bids and Awards Committee nga si Lemuel Ortonio; Direktor sa Administrative ug Financial Services nga si Rosalynne Sanchez; Special Disbursing Officer (SDO) nga si Gina Acosta; ug ang Chief Accountant nga si Juleita Villadelrey. Ipatawag sab sa komite sila kanhing DepEd Assistant Secretary Sunshine Charry Fajarda ug SDO Edwar Fajarda, nga sumala pa sa mga taho maoy anaa na sa buhatan na usab sa OVP.
Sa iyahang pinakaulahing sulat ngadto kang DOJ Secretary Jesus Crispin Remulla, gihisgutan ni Chua nga nakadawat matud pa ang iyahang komite sa impormasyon nga ang mga nahisgutang mga indibidwal adunay posibilidad nga migawas na kini sa nasud.
Ginaimbestigahan sa komite ang kwestyunable matud pang paggamit sa confidential funds sa OVP ug DepEd niadtong 2022 ug 2023.
