Dakpan sa kapulisan ang usa ka lalake human nga gitigbas niini ang iyahang kaugalingong apohan pasado alas 8 ang takna sa buntag kagahapong adlawa, sa Purok 7, New Masbate, Barangay Inayangan, Calinan District, ning dakbayan.
Sumala pa sa nahimong imbestigasyon sa Calinan Police Station, giila ang maong suspek nga si Jickie Pancho Bato, 33-anyos, walay trabaho, diin nasayran sab nga apo kini sa biktima.
Samtang giila sab ang biktima nga si Ernesto, 71-anyos, minyo, mag-uuma ug parehong nagpuyo sa susamang dapit.
Sumala pa usab sa pag-umangkon sa biktima, nakita matud pa niini si Jickie nga nagbitbit na og sundang, samtang nagbugha og kahoy ang biktima.
Apan, sa wala damha nga panghitabo, kalit na lamang matud pa niining gitigbas sa duha ka higayon ang biktima, diin largo kining naigo sa abaga ug sa tangkugo niini, ug maoy miresulta sa hinanaling kamatayon sa tigulang.
Misulod sab gilayon ang suspek ngadto sa ilahang panimalay ug lakip sab nga gitigbas ang iyahang inahan sa ulo nga bahin. Human sa maong panghitabo, dali nga miikyas ang maong suspetsado.
Dali sab nga gidala sa balay tambalanan ang inahan niini nga giilang si Elizabeth, gumikan sa nahiaguman niining samad sa ulo.
Apan, si Ernesto maoy dead on the spot, gumikan sa nahimong samad niini sa tangkogo nga bahin.
Naglusad gilayon og hot pursuit operation ang mga sakop sa mga otoridad, rason nga nadakpan ra dayon ang maong suspetsado.
Sa karun, padayong ginatambalan ang inahan sa suspetsado sa balay tambalanan ug gipahaluna na usab ang patayng lawas sa tigulang sa punirarya, samtang pasakahan na sab og kasong Parricide and Frustrated Parricide ang maong suspetsado.
